काठमाडौँ, ६ असोज ।
निजी क्षेत्रले नयाँ संविधानको घोषणापश्चात मुलुकभित्र जारी आन्दोलन सामान्य हुने विश्वास लिइएकामा पछिल्लो अवस्था निकै संवेदनशील भएको भन्दै चिन्ता व्यक्त गरेको छ ।
नेपाल उद्योग वाणिज्य महासङ्घ र नेपाल उद्योग परिसङ्घले छुट्टाछुट्टै विज्ञप्ति जारी गरी संवादका माध्यमबाट जनताका असन्तुष्टिलाई समाधान गरी मुलुकको सार्वभौमिकता र मुलुकले हासिल गरेको राजनीतिक उपलब्धिलाई जोगाउन आग्रह गरेको हो ।
वर्तमान सङ्कट निवारण गर्न आन्दोलनरत दल र तत्काल वार्ताको वातावरण बनाउन सरकार, मुख्य राजनीतिक दलसँग आग्रह गरिएको छ । मङ्गलबार भारतीय भन्सार नाकाबाट सामान नछुटेका र भारतीय पक्षबाट नाकाबन्दी भएको भनि सामाजिक सञ्जाल र केही सञ्चार माध्यममार्फत संप्रेषित समाचारहरु सत्यतामा आधारित नभएको महासङ्घले स्पष्ट पारेको छ ।
सत्यता बाहिर गएर गरिएका यस्ता प्रचारको पछाडि नलाग्न र आमजनताको दैनिक जीवनयापननै ठप्प पार्ने यस्ता भ्रामक प्रचार नगर्न नगराउनसमेत आग्रह गरिएको छ ।
