काठमाडौं, ३ असोज ।
नयाँ बानेश्वर स्थित संविधानसभा भवनलाई अहिले बेहुली झै सिंगारीएको छ ।‘नेपालको संविधान, २०७२’ घोषण हुने ऐतिहासिक स्थल संविधानसभा भवनभित्र उत्साह र उल्लास छाएको छ ।
सात दशक लामो संघर्षपछि संविधानसभाबाट संविधान जारी हुन लागेकोले संविधानसभा भवन सिंगारीएको हो ।
राष्ट्रिय भन्डा, रङ्गीचङ्गी ध्वजापताका र बेलुनले संविधानसभा परिसर सजिसजाउ देखिएको छ । भवनको बैठक कक्षको प्रवेश द्वारमा ‘संविधान उत्सव’ लेखिएको रङ्गीन ब्यानर बिछ्याइएको छ ।
सोही द्वारमा सभाध्यक्ष सुवास नेम्वाङले राष्ट्रपति डा रामवरण यादवलाई स्वागत गर्नुहुनेछ । भवनको परिसरमा चारैतिर विद्युतीय झिलीमिली देखिन्छ भने गमला र पानीका फोहराले साँझ ५ बजेको समयलाई व्यग्र प्रतीक्षा गरिरहेको भान हुन्छ ।
-
- नयाँ संविधान जारी गर्न संविधान सभा भवनको सिँगारपटारमा व्यस्त नेपाली सेना ।
समारोहमा विशिष्ट व्यक्तिको आगमनको क्रम सुरु भएको छ । अहिले ऐतिहासिक घटनाका प्रत्यक्ष समाचार सम्प्रेषणका लागि नेपाल टेलिभिजन, रेडियो नेपाललगायत राष्ट्रिय सञ्चारमाध्यमका प्रतिनिधिहरु खटिएका छन् भने सभासद् र पूर्वसभासद् तस्बिर खिचाउन व्यस्त देखिएका छन् ।
आज साँझ हुने भव्य समारोहकाबीच राष्ट्रपति डा. रामवरण यादवले नयाँ संविधान घोषणा गर्नुहुनेछ ।
-
- नयाँ संविधान जारी गर्न झकिझकाउ पारिएको संविधान सभा भवन ।
-
- दुलहीजस्तै सिँगारिएको संविधानसभा भवन
संविधानसभाका अध्यक्ष सुवासचन्द्र नेमवाङले प्रमाणीकरण गर्नुभएको संविधान राष्ट्रपतिले घोषणा गर्नुभएसँगै देशमा नयाँ संविधान लागु हुनेछ ।
