काठमाडौँ, ३० भदौ । नागरिक लगानी कोष र एनसिएम मर्चेन्ट बैंकिङ तथा एनएमवी क्यापिटल लिमिटेडबीच जलविद्युत् लगानी तथा विकास कम्पनी लिमिटेडको सर्वसाधारणको लागि प्राथमिक सेयर (आइपिओ) निष्काशन गर्न आज बिक्री प्रबन्धक सम्झौता भएको छ ।
जलविद्युत् कम्पनीको एक सय रुपैयाँ अङ्कित रु दुई अर्ब बराबरको दुई करोड कित्ता सेयर निष्काशन गर्न कोषले सह–निष्काशन तथा बिक्री प्रबन्धक कम्पनीसँग सम्झौता गरेको हो ।
कोषले गत वर्ष पुस ६ गते जलविद्युत् लगानी तथा विकास कम्पनीसँग सेयर निष्कासन सम्झौता गरेको कोषका सूचना अधिकृत उद्धव सिलवालले जानकारी दिनुभयो । जलविद्युत् कम्पनीको सेयर निष्कासन तथा बिक्री प्रबन्धकमा लगानी कोष रहेको छ ।
सेयर सह–निष्कासन सम्झौतामा कोषको तर्फबाट कार्यकारी निर्देशक रामकृष्ण पोखरेल, एनसिएम मर्चेन्ट बैंकिङको तर्फबाट विजयलाल श्रेष्ठ र एनएमवी क्यापिटलको तर्फबाट श्रीजेश घिमिरेले हस्ताक्षर गर्नुभएको हो ।
