काठमाडौं, २८ भदौ ।
नेपाल टेलिकमले फेरी ५० रुपैयाँको रिर्चाज कार्ड बजारमा ल्याएको छ । टेलिकमले ५० रुपैयाँको ‘एनटी रिर्चाज कार्ड’ बजारमा ल्याएको हो । प्रिपेड र पोष्टपेड मोबाईलका लागि प्रयोग गर्न सकिने गरी ५० रुपैयाँको रिर्चाज बजारमा ल्याईएको टेलिकमका सह प्रवक्ता डिल्लीराम अधिकारीले बताउनुभयो ।
एक वर्षदेखि ५० रुपैयाँको रिर्चाज बजारमा नल्याएको टेलिकमले आर्थिक अवस्था कमजोर भएका ग्राहकको सुविधालाई ध्यानमा राखेर ५० रुपैयाँको रिर्चाज बजारमा सहज रुपमा उपलब्ध गराउन लागेको सह(प्रवक्ता अधिकारीले जानकारी दिए ।
५० रुपैयाँको एनटी रिर्चाज कार्ड प्रिपेडका लागि प्रयोग हुन सक्ने भएपनि तत्काल पोष्टपेडका लागि प्रयोग गर्न नसकिने अधिकारीको भनाई छ । सिस्टम व्यवस्थापन भइरहेकोले यो सेवा दुई हप्ता भित्रै सुरु हुने टेलिकमले जनाएको छ ।
यसैगरी टेलिकमले आगामी दुईहप्ताभित्रै ५० रुपैयाँको नमस्ते रिर्चाज कार्ड पनि बजारमा ल्याउने भएको छ । आगामी दशैंसम्म सबै किसिमका रिर्चाज कार्ड बजारमा सहज रुपमा उपलब्ध हुने टेलिकमको दावी छ ।
