काठमाण्डौ,२५ भदौ ।
संविधानसभामा आजबाट शुरु हुने भनिएको मतदान प्रक्रिया दुई दिन स्थगित हुने भएको छ । आज बसेको प्रमुख तीन दलको बैठकले मतदान प्रक्रिया दुई दिन स्थगित गर्ने निर्णय गरेको हो ।
तराई मधेसमा भएका आन्दोलनको माग सम्वोधनका लागि प्रक्रिया रोक्न चौतर्फी दवाव बढेपछि नेपाली कांग्रेस, एमाले र एकीकृत माओवादीका शिर्ष नेताहरुको बैठकले प्रक्रिया रोकेर वार्ता गर्ने निर्णय गरेको हो ।
सहमतिका लागि दुई दिन प्रक्रिया रोक्ने र वार्ता गर्ने निर्णय भएका कांग्रेस उपसभापति रामचन्द्र पौडेलले जनाकारी दिनुभयो । एकीकृत माओवादीले बैठकमा प्रक्रिया रोक्न प्रस्ताव गरेपछि कंग्रेस सभापति एवंम् प्रधानमन्त्री सुशील कोइराला पनि तयार हुनुभएको स्रोतको भनाइ छ ।
यसअघि आजै संविधान निर्माणको प्रक्रिया केही दिन रोकेर आन्दोलनकारी दलहरुसँग वार्ता गर्न ६ साना दलले माग गरेका छन ।
संविधान निर्माणमा प्रमुख तीन दललाई समर्थन दिदै आएका राष्ट्रिय जनमुक्ति पार्टी लोकतान्त्रिक, खम्वुवान राष्ट्रिय मोर्चा, दलित जनजाति पार्टी, नेपा राष्ट्रिय पार्टी, मधेस समता पार्टी र नेपाली जनता दलले आज विज्ञप्ति जारी गर्दै प्रक्रिया केही दिन रोकेर वार्ताका माध्यमबाट समस्या समाधान गर्न आग्रह गरेका हुन ।
यसैविच संबिधान सभाको बैठक आइतबार सम्मलाई स्थगीत गरीएको छ । विहान सैद्धान्तिक छलफल टुंग्याउँदै मतदान प्रक्रियामा जाने पूर्व कार्यतालिका परिवर्तन गर्दै संविधानसभाको बैठक स्थगित गरिएको छ ।
संविधानसभाका अध्यक्ष सुवास नेम्वाङले अर्काे बैठक आइतबार बिहान साढे ११ बजेलाई बोलाउनु भएको छ ।
