चितवन, २५ भदौ ।
सुत्केरीको मृत्यु भएपछि भरतपुरको ओम अस्पताल तनावग्रस्त भएको छ । पाठेघर फुटेर सुत्केरी हुन आएकी चित्रवन नगरपालिका वडा नं ८ की ३० वर्षीया मञ्जुकुमारी महतोको मृत्यु भएको छ ।
उनलाई सुत्केरी बेथा लागेपछि भदौ २२ गते भरतपुरको ओम अस्पतालमा भर्ना गरिएको थियो । अस्पतालमा बच्चा जन्माउने क्रममा उनको पाठेघर फुटेर शिशुको समेत मृत्यु भएको अस्पतालले जनाएको छ ।
भदौ २३ गते सामान्य प्रक्रियाबाट सुत्केरी गराउने क्रममा उनको पाठेघर फुटेको र ओम अस्तालमा उपचार सम्भव नभएपछि भरतपुर अस्पतालमा पठाइएको अस्पतालका चिकित्सक डा विनोद पाठकले बताउनुभयो । उपचारका क्रममा महतोको बिहीबार राति मृत्यु भएको थियो ।
उपचारका क्रममा महतोको चिकित्सकको लापर्बाहीका कारण मृत्यु भएको भन्दै उनका आफन्तले आज बिहानैदेखि अस्पताल अगाडि नाराबाजी गरिरहेका छन् ।
उनको उपचारमा संलग्न चिकित्सकलाई कारबाहीको माग गर्दै उनीहरुले नाराबाजी गरेका हुन् ।
