काठमाडौँ, २४ भदौ ।
प्रधानमन्त्री सुशील कोइरालासँग नेपालका लागि संयुक्त राज्य अमेरिकाका राजदूत पिटर डब्लु बोडेले आज बिदाई भेट गर्नुभएको छ ।
भेटमा राजदूत बोडेले संयुक्त राष्ट्रसङ्घ महासभाको समयमा अमेरिकी राष्ट्रपति बाराक ओबामाले आयोजना गर्नुहुने शान्ति सेना पठाउने प्रमुख राष्ट्रहरुको बैठकमा प्रधानमन्त्री कोइरालालाई विशेष निमन्त्रणा दिनुभएको थियो ।
राजदूत बोडेले राष्ट्रपति ओबामाका तर्फबाट विश्वमा शान्ति कायम राख्न नेपालले शान्ति सेना पठाएर गरेको सहयोगको प्रशंसासमेत गर्नुभएको प्रधानमन्त्रीका परराष्ट्र सल्लाहकार डा दिनेश भट्टराईले राससलाई जानकारी दिनुभयो ।
प्रधानमन्त्री कोइरालाले अमेरिकाले नेपालमा रहेका भुटानी शरणार्थीको व्यवस्थापनमा गरेको सहयोगका लागि धन्यवाद दिनुहुदै थप सहयोगको अपेक्षा गर्नुभएको थियो । साथै उहाँहरुबीच नेपाल–अमेरिका सम्बन्धका साथै संविधान निर्माण प्रक्रियाका बारेमा पनि कुराकानी भएको परराष्ट्र सल्लाहकार भट्टराईले बताउनुभयो ।
आफ्नो कार्यकाल सम्पन्न गरी स्वदेश फर्किन लाग्नुभएका राजदूत बोडेले प्रधानमन्त्री कोइरालालाई समयमै संविधान जारी गर्न शुभकामना दिनुभएको थियो । राजदूत बोडेले भूकम्पपछिको पुनःनिर्माणको थालनी छिट्टै होस् भन्ने कामना गर्नुहुँदै अमेरिकाले सहयोग गर्ने बताउनुभएको थियो ।
