काठमाण्डौ,२४ भदौ ।
आन्तरिक राजस्व कार्यालय मकवानपुरले गत आव २०७०÷७१ मा विभिन्न प्रकारको राजस्वबापत रु एक अर्ब ८१ करोड ३४ लाख ६९ हजार राजस्व असुली गरेको छ ।
अन्तःशुल्कतर्फ रु एक अर्ब १७ करोड ७४ लाख ६५ हजार, मूल्य अभिवृद्धि करबापत रु ३२ करोड ५० लाख र आयकरतर्फ रु २८ करोड ७९ लाख चार हजार राजस्व असुली गरिएको छ ।
यसैगरी घर बहाल राजस्वमा रु १४ करोड पाँच लाख ५२ हजार, ब्याज करबापत रु १२ करोड सात लाख २३ हजार, शिक्षा सेवा करतर्फ रु २७ लाख ५० हजार र स्वास्थ्य सेवा करतर्फ रु एक लाख ८२ हजार राजस्व असुली गरेको सो कार्यालयले जनाएको छ ।
प्रमुख राजस्व सङ्कलनमध्ये हेटौँडा औद्योगिक क्षेत्रको गोर्खा लारी चुरोट उद्योग प्रालि, एसियन पेन्टस् प्रालि, यति पेन्टस् प्रालि, शिवम् सिमेन्ट उद्योग, हेटौँडा सिमेन्ट उद्योगलगायत विभिन्न आयोजना रहेको छ ।
कार्यालयले गत आवको भन्दा करिब रु नौ करोड ७४ लाख ७० हजार थप राजस्व असुली गर्न सफलता प्राप्त गरेको आन्तरिक राजस्व कार्यालयका कर अधिकृत नवीन्द्र श्रेष्ठले बताउनुभयो ।
