काठमाडौँ, २४ भदौ ।
राष्ट्रपति डा रामवरण यादवले प्रधान सेनापतिमा नियुक्त हुनुभएका रथी राजेन्द्र क्षत्रीलाई आज नेपाली सेनाको महारथीको दज्र्यानी चिह्न प्रदान गर्नुभएको छ ।
राष्ट्रपति भवन शीतल निवासमा आयोजित विशेष समारोहमा राष्ट्रपति यादवले नवनियुक्त प्रधानसेनापति क्षत्रीलाई महारथीको फुली (दज्र्यानी चिह्न) लगाइदिनुभएको हो । राष्ट्रपति यादव नेपाली सेनाका परमाधिपति हुनुहुन्छ । सो अवसरमा प्रधानसेनापति क्षत्रीले राष्ट्रपतिसँग पद तथा गोपनीयताको शपथ लिनुभयो ।
मन्त्रिपरिषद्को गत साउन २८ गतेको बैठकले उहाँलाई आजै देखि लागू हुनेगरी प्रधानसेनापति पदमा नियुक्त गर्ने निर्णय गरेको थियो । समारोहमा उपराष्ट्रपति परमानन्द झा, प्रधानमन्त्री एवम् रक्षामन्त्री सुशील कोइराला, प्रधानन्यायाधीश कल्याण श्रेष्ठ, परराष्ट्रमन्त्री मन्त्री महेन्द्रबहादुर पाण्डे, संवैधानिक निकायका प्रमुख एवम् अरु सुरक्षा निकायका प्रमुखहरु उपस्थित हुनुहुन्थ्यो ।
यसैबीच, नेपाली सेनाको ४२औँ प्रधानसेनापतिका रुपमा उहाँले सैनिक मुख्यालय जङ्गी अड्डामा आजै पदभार ग्रहण गर्नुभएको छ । यसअघि मुख्यालयमा उहाँको सम्मानमा सेनाको एक टुकडीले सम्मान गारत अर्पण गरेको थियो । यसअघिका प्रधानसेनापति गौरवशम्शेर राणा आजैदेखि सेवानिवृत्त हुनुभएको छ ।
नवनियुक्त प्रधानसेनापति क्षत्रीको सम्मानमा नेपाली सेनाले आजै साँझ स्वागत समारोहको कार्यक्रम राखेको छ । उहाँले गएको साउन २६ गतेदेखि कायममुकायम प्रधानसेनापति भई जिम्मेवारी सम्हाल्दै आउनुभएको थियो ।
