सप्तरी, २३ भदौ ।
सप्तरीको भारदह आसपास स्थिति अनियन्त्रित बनेपछि स्थानीय प्रशासनले कर्फ्यु लगाउने निर्णय गरेको छ । जिल्ला सुरक्षा समितिको बैठकले आज दिउसो २ बजेदेखि कर्फ्यु लगाउने निष्कर्ष निकालेको हो ।
पूर्वमा कङ्कालनी मन्दिभन्दा पाँच सयमिटर पूर्व, उत्तरमा पोर्ताहा चोक बस स्ट्यान्डदेखि पाँच सय मिटर उत्तर, पश्चिममा बारदह टेम्पु स्ट्यान्डदेखि ३ सय मिटर पश्चिम र दक्षिणमा सकरदही नहरदेखि पाँच सयमिटर दक्षिण सम्मको क्षेत्रमा कफ्र्यु आदेश गरिएको जिल्लाका प्रहरी प्रमुख एसपी शिशिरकुमार कर्माचार्यले बताउनुभयो ।
उहाँका अनुसार कर्फ्यु भोलि बिहान ६ बजेसम्मका लागि जारी गरिएको हो ।
उता बिराटनगर भन्सार कार्यालयको सुरक्षार्थ खटिएका प्रहरीमाथि मधेसी मोर्चाका कार्यकर्ताले आक्रमण प्रयास प्रहरी र प्रदर्शनकारीबीच झडप भएको छ ।
सीमावर्ती भन्सार कार्यालय नजिकै रहेको प्रहरी बिट जलाउन पुगेका प्रदर्शनकारीले ड्युटीमा रहेका तीनजना प्रहरीलाई पेट्रोल खन्याएर जिउँदै जलाउन खोजेका थिए ।
आफूहरुमाथि आक्रमण भएपछि भन्सार कार्यालय सुरक्षार्थ खटिएका सशस्त्र प्रहरी र जनपथ प्रहरीले हवाई फायर गरेका छन् । प्रदर्शनकारीको हानेको ढुंगाले लागेर ३ जना प्रहरी घाइते भएका छन् ।
झडपका क्रममा सशस्त्रले १० र जनपथ प्रहरीले १ राउन्ड हवाई फायर गरिएको बिराटनगर भन्सार कार्यालय सरक्षार्थ खटिएका इन्स्पेक्टर गंगाप्रसाद पौडेलले जानकारी दिनुभयो ।
अराजक शैलीमा प्रस्तुत भएका मधेसी मोर्चाका कार्यकर्ताले भन्सार कार्यालय नजिक रहेका मानब बेचबिखनविरुद्ध सक्रिय माइती नेपाल र केआई नेपालको कार्यालय पनि तोडफोड गरेका छन् । झडपछि अहिले बिराटनगर भन्सारक्षेत्र तनावग्रस्त छ ।
