काठमाडौ १९ भदौ ।
चिकित्सा शिक्षा सम्बन्धी माथेमा कार्यदलको प्रतिवेदन कार्यान्वयन सहितका माग गर्दै अनशनमा रहनु भएका डा. गोबिन्द केसीको पदाधिकारी र सरकारी पक्षबीच आज पनि वार्ता हुदै छ ।
यसअघि हिजो राति अबेरसम्म भएको वार्तामा धेरैजसो कुरा मिलेको र केही मिल्न बाँकी विषयमा आज थप छलफल गरी टुंगोमा पुग्ने तयारी भैरहेको वार्तामा सहभागी डाक्टर जीवन क्षेत्रीले बताउनुभयो ।
माथेमा कार्यदलको प्रतिवेदन कार्यान्वयनमा सरकारी पक्ष सकारात्मक भएपनि थप माग सम्बोधनका विषयमा कुरा मिल्न बाँकी रहेको उहाको भनाई छ ।
डा. क्षेत्रीका अनुसार पदाधिकारी नियुक्तीमा भैरहेको अनियमितता रोक्नुपर्ने तथा काठमाण्डू विश्व विद्यालयको सम्बन्धन स्थगन गर्नुपर्ने मागमा सरकार सहमत भएको छैन ।
यस्तै १३ दिनदेखि अनशनरत डा. केसीको स्वास्थ्य अवस्था नाजुक बन्दै गएको उपचारमा संलग्न चिकित्सकहरुले बताएका छन् ।
डा. केसीको मागप्रति समर्थन जनाउदै त्रिवि शिक्षण अस्पतालका आवासीय चिकित्सकहरुले गरेको ओपिडी सेवा बन्द आज पनि जारी छ ।
