काठमाण्डौ,१८ भदौ ।
जिल्ला सुरक्षा समिति पर्साले दोहोरो झड्पमा परि मृत्यु भएका ५ जनालाई सहिद घोषणाका लागि गृहमन्त्रालयमा सिफारिस गर्ने निर्णय गरेको छ ।
आज बसेको समितिको बैठकले गत सोमबार र मंगलबार पटक पटकको दोहोरो झड्पमा सुरक्षाकर्मीको गोली लागी ज्यान गुमाएका ५ जनालाई सहिद घोषणाका साथै आश्रति परिवारलाई राहत तथा आर्थिक सहायता उपलब्ध गराउन सिफारिस गर्ने निर्णय भएको सहायक प्रमुख जिल्ला अधिकारी अनुज भण्डारीले जानकारी दिनुभयो ।
साथै बैठकले झड्पकै क्रममा घाइतेलाई निशुल्क उपचारका लागि समेत सिफारिस गर्ने निर्णय गरेको छ । यसैबिच दोहोरो झडपसँगै वीरगन्ज तनावग्रस्त बन्दै गएपछि स्थानीय प्रशासनले गत सोमबारदेखि जारी गरेको अनिश्चित कफ्र्यू केही खुकुलो पार्दै गएको छ । हिजो २ घन्टाका लागि कफ्र्यू हटाएको प्रशासनले आज ३ घन्टाको लागि हटाउने निर्णय गरेको छ ।
