काठमाण्डौ,१८ भदौ ।
प्रधानमन्त्री सुशील कोइरालाले नेपाली भाषा–साहित्यको धरोहरका रूपमा रहेको ‘साझा प्रकाशन’ लाई डुब्न नदिन सरकारले आवश्यक सहयोग गर्ने बताउनुभएको छ ।
‘साझा बचाउ अभियान’ अन्तर्गत आज सो संस्थाका पदाधिकारी र वरिष्ठ स्रष्टासँगको भेटवार्तामा कोइरालाले संस्थाको कार्ययोजनाअनुसार आर्थिक घाटा पूर्ति तथा चालु पुँजी व्यवस्थापन गर्न माग भएको रकम निकासका लागि अर्थ मन्त्रालयलाई आग्रह गर्ने प्रतिबद्धता व्यक्त गर्नुभएको हो ।
उहाले आर्थिक अनियमितताका कारण सो संस्था डुबेको सुन्नुपर्दा आफूलाई दुःख लागेको र नयाँ व्यवस्थापनले सुधारका कार्यक्रम अघि सारेकामा प्रसन्नता जनाउँदै सरकारी स्वामित्वमा रहेका संस्थालाई टिकाएर जनतालाई सेवा दिनुपर्नेमा जोड दिनुभयो ।
प्रकाशनका अध्यक्ष तथा महाप्रबन्धक डोलिन्द्रप्रसाद शर्माले तत्कालका लागि रु २० करोड रकम सहुलियत ऋण प्राप्त भएमा कर्मचारीमा स्वेच्छिक अवकाश र आन्तरिक सुधार गरी संस्थालाई नाफामा लान सकिने बताउनु भयो ।
गत साता शिक्षा मन्त्रालयले विद्यालय तहका पाठ्यपुस्तकको उत्पादन र वितरणमा जनक शिक्षा र साझा प्रकाशनलाई पुनः एकाधिकार दिने निर्णय गरेको थियो ।
