काठमाडौ १८ भदौ ।
प्रदेशको सिमांकन लगायत संविधानको विभिन्न बुँदामा असन्तुष्टी जनाउदै आन्दोलनरत पक्षलाई पनि समावेश गरेर संविधान जारी गर्ने तयारीमा रहेका प्रमुख दलले आज पनि छलफल गर्दैछ । त्यसका लागि दलहरुको बैठक प्रधानमन्त्री निवास बालुवाटारमा आज बस्दैछ ।
शिर्ष नेता सम्मिलित बैठकमा आन्दोलनरत समुहका माग सम्बोधनका लागि संविधान संशोधन गरेर अघि बढ्ने बारेमा छलफल हुने नेताहरुले बताएका छन् ।
तराईमा उठेका असन्तुष्टी सम्बोधन गर्ने विषयमा प्रमुख दल एकमत भएपनि कुन कुन विषय समेट्ने भन्ने विषयमा सहमति जुटेको छैन ।
यसअघिका बैठकमा फोरम लोकतान्त्रिकले तराईमा एक प्रदेश थपेर आठ प्रदेश बनाउनुपर्ने प्रस्ताव अघि बढाएको छ भने एकिकृत नेकपा माओवादीले सात प्रदेश भित्रै सिमांकन हेरफेर गर्नुपर्ने बताएको छ ।
कांग्रेस र एमालेले भने छुट्टै प्रस्ताव ल्याएको छैन । यसैबीच चार दल बैठक बस्नुअघि नेकपा एमाले र एकिकृत नेकपा माओवादीका केही नेताबीच बालुवाटारमा छलफल समेत भएको बताइएको छ ।
