काठमाण्डौ,१६ भदौ ।
प्रधानमन्त्री सुशील कोइरालाले हिंसात्मक आन्दोलनमा नजान आन्दोलनरत पक्षलाई आग्रह गर्नुभएको छ ।
आदिवासी–जनजाति बृहत् संयुक्त सङ्घर्ष समितिका प्रतिनिधिसँग बिहान भएको भेटमा उहाले समस्याको समाधान शान्तिपूर्ण रुपमा वार्ताका माध्यमबाट गर्न सकिने भएकाले हिंसात्मक आन्दोलनमा नजान आग्रह गर्नुभयो ।
प्रधानमन्त्री कोइरालाले मुलुक शान्ति र स्थिरतातर्फ लम्किरहेका बेलामा कैलाली, पर्सा, बारालगायतका जिल्लामा भएको घटना निकै दुःखद भएको बताउदै विभिन्न राजनीतिक आस्था र विचार भएका पार्टी लचिलो रुपमा प्रस्तुत भई सबैको भावनालाई समेटेर पहिलोचोटी संविधानसभाबाट संविधान जारी हुने बताउनु भयो ।
आन्दोलनरत आदिवासी–जनजाति बृहत् संयुक्त सङ्घर्ष समितिले संविधानको विधेयकमा भएका प्रावधानमा जनजाति आयोग गठन गरिनुपर्ने, प्रदेशको संरचनामा जातीय सम्बन्ध र बसोबासलाई सहज हुनेगरी बनाउनुपर्ने, संविधानमा समानुपातिक समावेशी भन्ने वाक्यांश राखिनुपर्नेलगायतका माग राख्दै कोइरालालाई ज्ञापनपत्र बुझाएको छ ।
