काठमाडौ १४ भदौ ।
अरुण पूर्वका नौ जिल्लालाई लिम्बुवान प्रदेश बनाउनु पर्ने माग राख्दै संघीय लिम्बुवान पार्टी नेपालले आह्वान गरेको बन्दका कारण विहानैबाट त्यस क्षेत्रको जनजीवन प्रभावित बनेको छ ।
अरुण पूर्वका नौ जिल्लामात्र भएको प्रदेश चाहिने भन्दै उनीहरुले पूर्वका नौ जिल्लामा आज र भोली दुई दिने आमहड्तालको आह्वान गरेका हुन् ।
बन्दका कारण पूर्वका ताप्लेजुङ, पाँचथर, ईलाम, झापा, तेह्रथुम, संखुवासभा, धनकुटा, मोरङ र सुनसरीको जनजीवन प्रभवित बनेको छ ।
ती क्षेत्रमा विहानैदेखि लामो तथा छोटो दूरीका सवारी साधन सन्चालनमा आउन सकेका छैनन् भने शिक्षण संस्था कलकारखाना, बजार पसल ठप्प छन् । ताप्लेजुङमा भने लाखे जात्रा भएकाले बजार खुल्ला गरिएको छ ।
चार दलले अरुणपूर्वका नौ जिल्लामा सगरमाथा अञ्चलका पाँच जिल्ला पनि थपेर प्रदेश बनाएपछि उनीहरु असन्तुष्ट बनेका हुन् ।
