काठमाडौ १४ भदौ ।
प्रधानमन्त्री सुशील कोइरालाले आन्दोलनरत मधेश केन्द्रित दल, थारु कल्याणकारीसभा तथा थरुहट-थारुवान संयुक्त संघर्ष समितिलाई वार्ताका लागि अह्वान गर्दै पुनः पत्राचार गर्नुभएको छ ।
प्रमुख दलहरुबीच संविधान निर्माण प्रक्रिया र वार्तालाई सँग सँगै लैजाने गरी भएको सहमतिका आधारमा प्रधानमन्त्री कोइरालाले आन्दोलनरत पक्षलाई वार्तामा आउन पुनः आह्वान गर्दै पत्राचार गर्नुभएको हो ।
तराई क्षेत्रमा आन्दोलनरत मधेशवादी दल तथा थरुहट-थारुवान संयुक्त संघर्ष समितिले यसअघि प्रधानमन्त्रीले पठाएको पत्रको जवाफमा संविधान निर्माण प्रक्रिया रोक्नु पर्ने लगायतका माग राख्दै जवाफ पठाएका थिए ।
प्रधानमन्त्री कोइरालाले पठाउनु भएको जवाफमा सम्बन्धित पार्टीहरुका तर्फबाट उठाइएका विगतका सम्झौता तथा सहमतिलाई कार्यान्वयन गर्ने विषयलाई सरकारले यस अघि गरेका निर्णय र प्रस्तावित संविधानको विधेयकमा समेटिएका विषयलाई एकीकृत गरी वार्तामा बसेर छलफल गर्न सकिने बताउनु भएको छ ।
उहाँले समेट्नु पर्ने विषयमा सहमति गरी संविधानको विधेयक संशोधनमा अझै पनि समावेश गर्ने प्रयत्न गर्न सकिने बताउनु हुदै आपसी सहमतिलाई तत्काल विधेयकमा समावेश गरेर संविधान निर्माणको चालु प्रक्रियालाई परिणाममुखी बनाउन सकिने उल्लेख गर्नु भएको छ ।
