काठमाण्डौ,१३ भदौ ।
टीकापुर घटनाले पत्रकारमा बढेको असुरक्षाको अवस्था बुझ्न नेपाल पत्रकार महासंघको टोली कैलालीको टीकापुरमा गएको छ ।
महासंघका महासचिव उजिर मगरको नेतृत्वमा गएको टोलीले टीकापुरमा रही पत्रकारिता गरिरहेका पत्रकारसँग यहाँको अवस्थाबारे जानकारी लिएको छ ।
महासंघ टोलीसंगको छलफलमा पत्रकारहरुले आफूहरु पहाडिया र थारु दुबै पक्षबाट असुरक्षित रहेको गुनासो गरेका छन । आन्दोलनरत दुबै पक्षले आफनो अनुकुल समाचार आउँदा मात्र पत्रकारलाई राम्रो भन्ने गरेको बताएका छन ।
टीकापुर घटनापछि एक समुदायमा जन्मेको पत्रकार अर्को समुदायमा ढुक्कसँग जान सक्ने अवस्था नरहेको पत्रकारहरुले टोलीलाई जानकारी गराएका छन ।
टोलीका संयोजक उजिर मगरले अहिले बिग्रेको सद्भाव कायम गर्न छापा तथा विद्युतीय माध्यममा सद्भाव कायम हुने किसिमका नाराहरु प्रकाशित र प्रसारित गर्न सुझाब दिनुभयो ।
