काठमाडौं, १३ भदौ ।
भूकम्प पीडितलाई वितरण गर्न राखिएको गोदाम घरबाट हराएका जस्तापातालगायतका निर्माण सामाग्रीहरु प्रहरी निरीक्षकको घरबाट बरामद गरिएको छ ।
धादिङसँग सिमा जोडिएको गोरखाको विद्यालयलाई अस्थायी टहरा निर्माण गर्न आरुघाट बजारमा गोदाम गरी राखिएका जस्तापाता र तयारी अवस्थाका ग्रिलट्रष्ट हराएको भन्दै खोजी थालिएको थियो ।
स्थानीय बासिन्दाहरुले ईलाका प्रहरी कार्यालयमा कार्यरत प्रहरी निरीक्षक रविन्द्र खनालले राहत सामाग्रि धादिङ नलाङस्थित आफ्नो घरमा पठाएको उजुरी दिएपछि जिल्ला प्रहरी धादिङले नलाङ–३ आप्रि टोलस्थित प्रहरी निरीक्षक खनालको घर खानतलासी गरेको थियो ।
सोहि क्रममा उनको घरमा १ सय २ थान जस्तापाता र १२ वटा ट्रष्ट लाई पुग्ने ग्रिल वरामद भएको होे ।
राहत सामाग्री वरामद भएलगत्तै प्रहरी प्रधान कार्यालयले प्रहरी निरीक्षक खनाललाई प्रधान कार्यालयमा उपस्थित हुन आदेश दिएको छ । खनाल आज धादिङस्थित प्रहरीको सम्पर्कमा आएका छन् ।
