काठमाण्डौ,१० साउन ।
नवलपरासीको कुडियामा १० वर्षीय बालकलाई बली दिने ५ जना अभियुक्त पक्राउ परेका छन । प्रहरीले पक्राउ गरेकाहरूले बालिकलाई बली दिएको स्वीकार गरेका हुन् ।
कोदाइ हरिजनसहितका पक्राउ परेका अभियुक्तले नवलपरासीको कुडिया–४ का परमानन्द कोहारको १० वर्षीय छोरा जीवन कोहारलाई साउन ५ गते बालकलाई गाउँको मन्दिरनजिक लगेर बली दिएको स्कीकारेका छन ।
पक्राउ पर्नेमा कोदाइ हरिजन, बिरामी भनिएका उनका १८ वर्षका छोरा विजय हरिजन, झाक्री गंगा हरिजनसहित ५० वर्षीय रुदल हरिजन र ३२ वर्षीय सूर्यमान हरिजनलाई प्रहरीले पक्राउ गरेको हो ।
मंगलबारदेखि वेपत्ता भएका बालकको शव दुर्गा मन्दिर नजिकै भेटिएपछि स्थानीयले बालकलाई बली दिएको आशंका गरेका थिए । आफ्नो १८ वर्षीय छोरा विजय हरिजन बेलाबेलामा बिरामी हुने गरेको र बालकको बली दिएमा निको हुने धामीको विश्वासमा छिमेकीको छोरालाई बली दिएको कोदाइले प्रहरीसमक्ष स्वीकारेका छन ।
बालक जीवन हरिजनलाई बिस्कुट दिएर पछि अरू पैसा दिने लोभ देखाई गाउँको सिमाना मन्दिरनजिक लगेर तीनजनाले समातेको र कोदईले घरेलु हतियारको प्रयोग गरी बालकको घाँटी रेटेर हत्या गरेको प्रहरी अनुसन्धानमा खुल्न आएको प्रहरी उपरीक्षक नलप्रसाद उपाध्यायले बताउनु भयो ।
कोदईले हत्या गर्न सघाउनेलाई ५० हजार दिने भनी वचन दिएको हत्यामा संलग्नले बताएका छन् । बालकलाई बली दिने सबै अभियुक्तलाई पक्राउ गरिएकाले कानुनबमोजिम कारबाही प्रक्रिया अघि बढाएको प्रहरी उपरीक्षक नलप्रसाद उपाध्यायले जानकारी दिनुभयो ।
