काठमाडौं, साउन ६ ।
नेपाली कांग्रेसका वरिष्ठ नेता शेरबहादुर देउवाले आफु पूर्ण प्रेस स्वतन्त्रताको पक्षमा रहेको बताउनु भएको छ ।
बीपी कोइरालाको ३३ औं स्मृति दिवसको अवसरमा प्रेस युनियनले आज राजधानीमा गरेको कार्यक्रममा नेता देउवाले पूर्ण प्रेस स्वतन्त्रता बिना लोकतन्त्र बलियो नहुने भन्दै आफू पूर्ण प्रेस स्वतन्त्रताको पक्षमा रहेको जिकीर गर्नुभयो ।
यस्तै उहाले आफू पार्टी एकताको पक्षमा रहेको पनि स्पस्ट पार्नुभएको छ । पार्टीमा ६० र ४० को भागबन्डा अन्त्य भएपछि मात्र सुशील कोइराला प्रधानमन्त्री बन्न सम्भव भएको बताउनु भयो । नेपाली कांग्रेसलाई ठूलो पार्टी बनाउन आफ्नो भूमिका महत्वपूर्ण रहेको पनि उहाले दाबी गर्नुभयो ।
यस्तै कार्यक्रममा नेता अर्जुननरसिंह केसीले कांग्रेसभित्र विचारभन्दा पनि व्यक्तिवादी प्रवृति हावी भएको भन्दै पार्टी सुदृढीकरणका लागि विशेष अभियान थाल्नुपर्ने बताउनु भयो । बीपीले देखाएको बाटोबाट पार्टी विचलित भएको भन्दै केसीले पार्टीलाई बीपीको विचारबाटै अगाडि बढाउनु पर्ने आवश्यक्त रहेकोमा जोड दिनुभएको थियो ।
कार्यक्रममा नेपाल प्रेस युनियनका अध्यक्ष बद्री सिग्देललगायतले नया संविधानमा पूर्ण प्रेस स्वतन्त्रताको ग्यारेन्टी गर्नुपर्ने बताउनु भएको थियो ।
