काठमाडौ ४ साउन । प्रधानमन्त्री सुशिल कोइरालाले आज र भोली देशभर हुने मस्यौदा माथि सुझाव दिने कार्यमा सहभागी हुन सबैलाई अपिल गर्नु भएको छ ।
एक अपिल जारी गर्दै प्रधानमन्त्री कोइरालाले नयाँ संविधानको प्रारम्भिक मस्यौदामा रहेका कुन कुन धारामा कस्तो व्यवस्था गर्दा उपयुक्त हुन्छ भन्ने विषयमा आ आफ्नो सुझाव दिन आग्रह गर्नु भएको हो ।
‘मस्यौदामा निहित कुन कुन धारा र प्रावधानलाई कस्तो बनाउदा उपयुक्त हुन्छ भन्ने विषयमा आफ्नो ज्ञान र अनुभवमा आधारित सुझाव दिएर यस महाअभियानमा सरिक हुन स्वेदेश तथा विदेशमा रहनु हुने समस्त नेपाली दाजुभाइ तथा दिदीबहिनीहरुलाई आग्रह गदर्छु’ प्रधानमन्त्री कोइरालाद्धारा जारी अपिलमा उल्लेख छ ।
आफ्नो संविधान आफै निर्माण गर्ने जनताको एक शताब्दी देखिको चाहना र संघर्षले संविधान निर्माणसँगै साकार रुप लिन लागेको भन्दै प्रधानमन्त्री कोइरालाले बहुलवादमा आधारित लोकतान्त्रिक संविधानले सबै नेपालीको सुनौलो भविष्यको मार्ग खोल्ने विशवास व्यक्त गर्नुभयो ।
