काठमाण्डौ, २६ असार ।
नक्कली भूकम्पपीडित बनेर सरकारको राहत दुरुपयोग गरेका करिब ५० जनालाई पक्राउ गर्न जिल्ला प्रशासन कार्यालय काभ्रेपलाञ्चोकले निर्देशन दिएको छ ।
किटानी उजुरीका आधारमा उनीहरुलाई जिल्लाका पात्लेखेत र चण्डेनीमण्डन गाविस तथा पाँचखाल नगरपालिकाबाट पक्राउ गर्न लागिएको प्रशासकीय अधिकृत अर्जुन रिसालले जानकारी दिनुभयो ।
भूकम्पपीडितका नाममा उनीहरुले सरकारले उपलब्ध गराएको रु १५ हजारका दरले कुल रु सात लाख ५० हजार र परिचयपत्र लिएका छन् । तीन गाविसमध्ये सबैभन्दा बढी चण्डेनीमण्डनमा नक्कली भूकम्पपीडितका नाममा राहत रकम दुरुपयोग भएको किटानी उजुरी परेको छ ।
प्रमुख जिल्ला अधिकारी सुदर्शन ढकालका अनुसार उनीहरुलाई पक्राउ गर्नका लागि प्रहरीलाई पत्राचारसमेत गरिएको छ । भूकम्पपछि एउटै घरमा बसेका परिवार अलग भएर राहत रकम लिएको र वैकल्पिक वासस्थान हुँदाहुँदै पनि सुविधा लिएको भन्दै केही दिनअघि किटानी उजुरी परेको थियो ।
