काठमाडौं असार २५ । संविधानसभाले नयाँ संविधानको प्रारम्भिक मस्यौदामा आजबाट जनमत संकलनको काम शुरु गर्दैछ । यसअघि राजपत्रमा प्रकाशित गरिएको मस्यौदालाई विभिन्न सञ्चार माध्यमबाट प्रकाशन र प्रसारण गरेपश्चात् जिल्लामा खटिने टोलीले राय सुझाव लिनेछन् ।
यसअघि मस्यौदा माथि जनमत संकलनका लागि बनाइएको कार्ययोजना हिजोको संविधान सभा बैठकले पारित गरेको थियो । कार्ययोजना अनुसार जनमत संकलनका लागि बढीमा १५ दिनको समयसीमा निर्धारण गरिएको छ । नागरिक सम्बन्ध समितिले सुझाव सहितको प्रतिवेदन आगामी साउन ७ गते संविधान सभामा पेश गर्नु पर्ने कार्यसुची रहेको छ ।
मस्यौदा माथि विदेशमा रहेका नेपालीहरुका लागि विदेशस्थित दूतावास र सचिवालयको वेवसाइटबाट सुझाव लिने व्यवस्था मिलाइएको संविधानसभा सचिवालयले जनाएको छ ।
त्यस्तै, अन्तक्रिया मार्फत् नेपाल पत्रकार महासंघ, बार एसोसिएन सहितका पेशागत संगठन र नागरिक समाजको तर्फबाट सुझाव संकलन गरिने जनाइएको छ । निर्वाचन क्षेत्रमा सम्वन्धित सभासद् र कर्मचारी खटाउनेछ र त्यसका लागि उपसमिति समेत गठन गरिएको छ ।
साउन ४ र ५ गते सार्वजनिक सुनुवाई लगायत कार्यक्रम निर्धारण गरिएको सचिवालयले जनाएको छ । नागरिक सम्वन्ध तथा संविधान सुझाव समितिले तयार पारेको कार्ययोजनालाई संविधानसभाको बैठकले अनुमोदन गरेपछि जनमत संकलनको प्रक्रिया शुरु भएको हो ।
यसैवीच, मस्यौदाको विरोधमा रहेका मधेस केन्द्रित दलहरुले जनमतका लागि पूर्व निर्धारित एक महिनाको समय घटाएको भन्दै आपत्ति जनाएका छन् । चार दलका शीर्ष नेताको सहमति अनुसार बनाइएको मस्यौदा मान्य नहुने भन्दै संविधानसभाको हिजोको बैठकमा नारावाजी गरी बहिष्कार गरेका थिए ।
