काठमाण्डौ,२४ असार ।
शिक्षा मन्त्रालयले लामो समयदेखि अस्थायीमा कार्यरत शिक्षकका लागि सहुलियत पूर्ण अवकाश दिने प्रस्ताव अघि सारेको छ । शिक्षा ऐन संशोधनमै सो प्रावधान राख्ने प्रयास भए पनि संशोधनमा ढिलाइ भइरहेका बेला शिक्षक समुदाय र सरकारबीच २०६८ चैत २ मा भएको सहमतिका आधारमा अस्थायी शिक्षकलाई सहुलियत पूर्ण अवकाश दिन सरकार सकारात्मक भएको हो ।
सो व्यवस्था आसन्न आर्थिक वर्ष २०७२र०७३ को बजेट वक्तव्यमा पार्न शिक्षा मन्त्रालय र शिक्षक समुदाय लागिपरेका छन् । सो विषयमा नेपाल शिक्षक महासंघको राष्ट्रिय महासमितिका पदाधिकारी र शिक्षामन्त्री चित्रलेखा यादवबीच छलफल भएको थियो ।
महासंघले शिक्षकका पेसागत माग पूरा हुनेगरी शिक्षा ऐन संशोधन र सहुलियतपूर्ण अवकाश दिन चेतावनीपत्रसहित माग गरेपछि मन्त्री यादवले आफू सोही काममा लागिरहेको विश्वास दिलाउनुभएको थियो ।
हाल करिब २० हजार अस्थायी शिक्षक कार्यरत छन् । सरकारले बजेट तर्जुमा गरेमा त्यसमध्ये आधाजसो शिक्षक सहुलियतपूर्ण अवकाशमा जानसक्ने देखिएको छ ।
