काठमाडौं, २० असार ।
संविधानसभाको बैठक अहिले बसीरहेको छ । संविधानसभा भवन नयाँबानेश्वरमा जारी बैठकमा संविधानको प्रारम्भिक मस्यौदामाथि सभासदहरुले धारणा राखीरहेका छन ।
मस्यौदा माथि धारणा राख्दै कांग्रेस उपसभापति रामचन्द्र पौडेलले ६ वटा संघीय प्रदेश हुनुपर्ने बताउनुभयो । उपसभापति पौडेलले ६ प्रदेशमा सिमांकन गर्न सहज हुने तथा ८ वटा प्रदेश बढी हुने भन्दै ६ वटा संघीय प्रदेश राख्नुपर्ने धारणा राख्नुभएको हो ।
यस्तै स्थानीय निकायको सवालमा उहाँले जिल्ला गाउँ र नगरलाई कार्यकारी अधिकार दिनुपर्ने बताउनुभयो । संविधानसभाको मस्यौदा सहमतिको दस्तावेज भएको भन्दै उहाँले धर्मको विषयमा उत्पन्न विवादलाई परीमार्जन गर्न सकिने बताउनुभयो । सबै धर्म मान्नेलाई स्वतन्त्रता दिनुपर्ने उहाँको भनाई छ ।
यता कंग्रेस सभासद अमेरशकुमार सिंहले भने मस्यौदा गणतन्त्र,समावेशीता र समानुपातिक सिद्धान्त विपरीत भएको भन्दै विरोध गर्नुभयो । समाजवादी जनता पार्टीका सभासद प्रेमबहादुर सिंहले संविधानसभामाले सहमति जुटाएर मस्यौदाका लागि पठाएको विषय मस्यौदामा समावेश नभएको भन्दै मस्यौदाका त्रुटी सच्याइनुपर्ने माग गर्नुभयो ।
केहि दिन मस्यौदा माथि छलफल भएपछि संविधान सभाले सुझाव संकलनका लागि जनता माझ लैजाने तयारी गरेको छ । आगामी साउन १५ भित्र संविधान जारी गर्ने आन्तरिक तयारी रहेकाले मस्यौदामाथि संविधान सभामा छलफल सकेपछि राजपत्रमा प्रकाशित गर्ने सचिवालयको तयारी छ ।
यसैबिच मधेशबादी चार दलले संबिधान सभा बैठक बहिस्कार गरेका छन । संघीय समाजवादी फोरम नेपाल सहितका चार दलले बैठक बहिष्कार गरेका हुन ।
बैठकको सुरुमै विशेष समय लिएर बोल्दै तराइ मधेश लोकतान्त्रिक पार्टीका सभासद् सर्वेन्द्रनाथ शुक्लाले मस्यौदा माथिको छलफल आफूहरुका लागि अर्थहीन भएको बताउदै बैठक बहिष्कार गर्ने घोषणा गर्नुभएको थियो । घोषणासँगै चारदलका सभासदहरु बैठकबाट बाहिरिएका छन ।
