काठमाडौं,१४ असार ।
ब्यबस्थापिका संसदको विकास समितिले स्थानीय निकायको चुनावको मिति तत्काल घोषणा गर्न सरकारलाई निर्देशन दिएको छ । समितिले आज सो बिषयमा छलफल गर्न गृहमन्त्री बामदेव गौतम, स्थानीय विकास मन्त्री प्रकाशमान सिंह र कार्यबाहक प्रमुख निर्वाचन आयुक्त दोलखबहादुर गुरुङलाई बोलाएको थियो ।
बैठकमा गृहमन्त्री गौतमले स्थानीय निकायको चुनावमा राजनीतिक सहमति आवश्यक रहेको बताउनु भयो । उहाले चुनावका लागि राजनीतिक वातावरण भए सुरक्षाको प्रवन्ध मिलाउन समस्या नहुने दाबी गनुृभयो ।
उपप्रधानमन्त्री समेत रहेका स्थानीय विकास मन्त्री प्रकाशमान सिंहले पनि स्थानीय निकायको चुनावका लागि राजनीतिक सहमति पहिलो आवश्यकता रहेको बताउनु भयो । यस्तै कार्यवाहक प्रमुख निर्वाचन आयुक्त दोलख बहादुर गुरुङले सरकारले चुनावको मिति घोषणा गरे जुनसुकै अवस्थामा पनि आयोग तयारी अवस्थामा रहेको बताउनुभयो ।
समितिले निर्वाचन आयोगमा रिक्त आयुक्तहरुको पदपूर्ति गर्न पनि सरकारलाई निर्देशन दिएको छ । आयोग प्रमुख आयुक्तविहीन छ । त्यसअघि बैठकमा फोरम लोकतान्त्रिकका अध्यक्ष विजयकुमार गच्छदार, नेमकिपा अध्यक्ष नारायणमान विजुक्छे, राष्ट्रिय जनमोर्चाका अध्यक्ष चित्रबहादुर केसीलगायतले छिटो स्थानीय निकायको चुनाव गराउन माग गरेका थिए ।
