काठमाण्डौ, ९ असार ।
कार्यकर्ता पक्राउको बिरोधमा बिप्लब नेतृत्वको नेकपा माओवादीले आज साँझ गर्ने भनिएको जुलुस प्रदर्शनको कार्यक्रम फिर्ता लिएको छ ।
लिपुलेकलाई व्यापारीक केन्द्र बनाउने भारत र चीनबीच भएको सहमतिको विरोधमा गरेको कार्यक्रममा पक्राउ परेका कार्यकर्ता रिहाई भएपछि प्रदर्शनको कार्यक्रम फिर्ता लिएको हो ।
पार्टि प्रवक्ता खड्ग बहादुर बिश्वकर्मा प्रकाण्डले मलाल जुलुस सहित भोली देखि गर्ने भनिएको कडा संघर्षका कार्यक्रम फिर्ता लिईएको जानकारी दिनुभयो उहाँले भन्नुभयो, साँझको मसाल जुलुसको तयारीमै थियौँ । नभन्दै पक्राउ गरिएका कार्यकताहरुको रिहाई गरिएपछि संघर्षको कार्यक्रम फिर्ता लियौँ ।
यसअघि एक बिज्ञप्ति जारी गर्दै महासचिव नेत्रविक्रम चन्द ‘विप्लव’ले लिपुलेक सम्झौताको शान्तिपूर्ण प्रर्दशनमाथिको प्रहरी हस्तक्षपलाई क्रुर र हिंस्रक दमनको संज्ञा दिदै कडा संघर्षको कार्यक्रम अघि बढाउने चेतावनी दिनुभएको थियो ।
बिप्लब नेतृत्वको माओवादी निकट देशभक्त जनवादी संघीय गणतान्त्रिक मोर्चाले मध्यान्ह शान्ति बाटीकामा विरोध कार्यक्रममा प्रहरीले हस्तक्षेप गरेको थियो । प्रहरी हस्तक्षेपमा परी माओवादी अखिल नेपाल क्रान्तिकारी ट्रेड युनियनका सयोजक योगेन्द्र कुमाल सहित दर्जनौ माओवादी कार्यकर्ताहरु घाईते भएका थिए ।
प्रहरीले देशभक्त मोर्चाका अध्यक्ष सहित ३१ जना माओवादी नेता कार्यकर्ताहरु पक्राउ गरेको थियो । घाईते मध्य ७ जनाको बीर अस्पतालमा उपचार भईरहेको छ ।
