काठमाण्डौ, ३१ जेठ ।
एकीकृत नेकपा माओवादीका अध्यक्ष पुष्पकमल दाहालले प्रमुख चार राजनीतिक दलबीच भएको १६ बुँदे समझदारीले नयाँ राजनीतिक परिस्थिति सिर्जना गरेको बताउनुभएको छ ।
क्रान्तिकारी पत्रकार संघ, बाँकेद्वारा आज कोहलपुरमा आयोजित पत्रकार सम्मेलनमा उहाँले भन्नुभयो, ’यो समझदारीपछि जनतामा नयाँ विश्वास पलाएको छ, राष्ट्रिय राजनीति स्थिरतातर्फ अग्रसर भएको छ ।’
दाहालले आठ प्रदेशमा भएको समझदारी राजनीतिक शक्ति सन्तुलनको उपज भएको प्रष्ट पार्दै यसमा असन्तुष्टि जनाउनेहरुले समझदारीको वास्तविकता नबुझेको आरोप लगाउनुभयो ।
यो समझदारीलाई सत्ता समीकरणका रुपमा अपव्याख्या गर्न नहुने बताउँदै उहाँले कुनै पनि राजनीतिक समीकरण स्थायी नहुने र परिस्थितिअनुसार फेरबदल हुने स्पष्ट पार्नुभयो ।
समझदारीपछि असन्तुष्ट राजनीतिक दललाई सहमतिमा ल्याउने प्रयास हुने बताउँदै उनले नेकपा–माओवादीका अध्यक्ष मोहन वैद्यले हतारमा टिप्पणी गरेको बताउनुभयो ।
पत्रकारद्वारा सोधिएको प्रश्नको जवाफमा अध्यक्ष दाहालले गणतन्त्र, सङ्घीयता, धर्म निरपेक्षता र समावेशी जनयुद्ध, १९ दिने जनआन्दोलन, मधेस आन्दोलन र आदिवासी जनजाति आन्दोलनको माग भएकाले यसमा आफ्नो दलले कुनै पनि परिस्थितिमा सम्झौता नगर्ने विश्वास दिलाउनुभयो ।
