काठमाडौ , ३१ जेठ ।
संविधानको मस्यौदा लेखनका लागि १५ दिनको समयसीमा पाएको मस्यौदा लेखन समितिले आजबाट औपचारिक कार्य सुरु गर्दैछ । त्यसका लागि आज बिहान ११ बजे समितिको बैठक बोलाइएको छ ।
संसद सचिवालय सिंहदरबारमा बस्ने आजको बैठकमा दलहरुबीच भएको सहमति अन्तरगत राज्य पुनःसंरचना, शासकीय स्वरूप, निर्वाचन प्रणाली र न्याय प्रणाली लगायतका विषयमा मस्यौदा निर्माणका लागि छलफल हुनेछ ।
समिति अन्तर्गत रहेका पाँचवटा उपसमिति र एउटा कार्यदललाई आआफ्नो समिति अन्तर्गतका विषय दिइने समितिका सभापति कृष्णप्रसाद सिटौलाले जानकारी दिनु भयो ।
समिति र कार्यदलले सँगसँगै काम गर्ने बताइएको छ । यसअघि नै गठन भएका मस्यौदा उपसमिति र कार्यदललाई आवश्यकता अनुसार थपघट गर्ने विषयमा पनि आजको बैठकमा छलफल हुनेछ ।
दलहरुबीच पछिल्लो पटक भएको १६ बुँदे सहमतिका अधारमा सम्वाद समितिले तयार पारेको प्रतिवेदन बाहेक त्यसअघि संविधानसभामा भएका सहमति लाई आधार मानेर मस्यौदा समितिले प्रारमिभक प्रतिवेदन तयार पारिसकेको छ ।
