काठमाण्डौ, २९ जेठ ।
संविधानसभाले मस्यौदा निर्माणका लागि संवैधानिक समितिको प्रतिवेदन मस्यौदा समितिमा पठाइएको छ ।
संविधानसभाको शुक्रबारको बैठकमा सामान्य छलफलपछि दुई तिहाईभन्दा बढी बहमुतले उक्त प्रतिवेदनलाई मस्यौदा समितिमा पठाउने निर्णय गरेको हो ।
१५ दिनभित्र मस्यौदा तयार गरेर संविधानसभासमक्ष पेस गर्नुपर्ने निर्देशन संविधानसभाले प्रतिवेदन पठाएको हो।अब मस्यौदा निर्माणको काम सुरु हुनेछ ।
संविधानका विवादित विषय संघीयता, शासकीय स्वरुप, निर्वाचन प्रणाली र न्याय प्रणालीका सम्बन्धमा मुख्य चार राजनीतिक शक्तिहरुबीच सोमबार राति १६ बुँदे सहमति भएको थियो। संविधानको अन्तरबस्तुमा दलहरुबीच भएको सहमतिलाई संवैधानिक समितिले बिहीबार टुंगो लगाएर सभामा प्रस्तुत गरेको थियो ।
संविधानसभा अध्यक्ष सुवास नेम्वाङले मूल विवादमा सहमति भइसकेकोले (फास्ट ट्रयाक) विधिबाट छिटो संविधान जारी गर्नका लागि तयार हुन र त्यहीअनुसार कामलाई तीव्रता दिन दलहरुलाई आग्रह गरिसकेका छन् ।
नेम्वाङको निर्देशनमा असार मसान्तभित्रै संविधान जारी गर्ने गरी संविधान लेखनको नयाँ तालिकाको तयारी र योजनामा संविधानसभा सचिवालय लागेको छ ।
