काठमाडौं, २९ जेठ ।
संविधान सभाको बैठक आज पनि बस्दैछ । आज अपरान्ह ३ बजे संविधान सभा भवन नयावानेश्वरमा बस्ने बैठकमा सम्वाद समितिले पेश गरेको प्रतिवेदनमाथि छलफल हुँदैछ ।
संविधानसभामा प्रमुख दलहरूबीच भएको १६ बुँदे सहमतिलाई अनुमोदन गर्दै संवाद समितिले हिजो संविधानसभामा प्रतिवेदन पेस गरेको हो ।
केही दलको फरक मतसहित समितिका सभापति डा. बाबुराम भट्टराईले गएराती पेश गर्नु भएको प्रतिवेदन माथि आजदेखि छलफल हुन लागेको हो ।
सम्भव भए आजै छलफल सकेर सम्वाद समितिको प्रतिवेदन मस्यौदा लेखनका लागि मस्यौदा समितिमा पठाउने तयारी रहेको संविधानसभा सचिवालयले जनाएको छ ।
सचिवालयका अनुसार छलफल जतिसक्दो छोटो पारेर प्रतिवेदनलाई मस्यौदा समितिमा पठाउने तयारी भइरहेको छ ।
समितिलाई बढीमा १५ र कटीमा १० दिनको समय दिने तयारी भइरहेको छ ।
महत्त्वपूर्ण र नयाँ सहमति भएका विषय बाहेकका विगतका सहमतिका आधारमा मस्यौदा समितिले प्रारम्भिक खाका तयार पारिसकेको छ ।
संवाद समितिले दलहरूबीचको सहमति र सहमति गर्न छुटाएका केही महत्तपूर्ण विवाद निरूपण गरी प्रतिवेदन बनाउन कांग्रेसका पूर्णबहादुर खड्काको संयोजकत्वमा उपसमिति गठन गरेको थियो ।
