काठमाडौं, २६ जेठ ।
संविधानसभाको बैठक आज पनि बस्दैछ । लामो समयदेखि अवरुद्ध संविधान सभाले अब गति लिने भएको छ ।
गएराति दलहरुबीच भएको सहमति पछि आजबाट संविधानसभामा संविधान निर्माण प्रक्रिया अघि बढ्ने भएको हो ।
अपरान्न ३ बजेका लागि बोलाइएको आजको बैठकमा दलहरुले गरेको सहमति अनुमोदन हुने र संविधान निर्माणको कार्यतालिका पेश गर्ने तयारी रहेको संविधानसभा सचिवालयले जनाएको छ ।
प्रमुख दलहरूबीच संविधानका विवादित अन्तरवस्तुमा सहमति भएसँगै असार मसान्तभित्रै मुलुकलाई नयाँ संविधान दिने गरी कार्यतालिका तयार गरिएको छ ।
असार मसान्तमै संविधान जारी गर्ने उपाय सहितको कार्यतालिका कार्यव्यवस्था परामर्श समितिको आजको बैठकले निर्णय गर्ने संसद सचिवालयका प्रवक्ता मुकुन्द शर्माले जानकारी दिनुभयो ।
आजको बैठकले संविधानसभामा विचाराधीन सबै विषयमा सहमतिका लागि संवैधानिक राजनीतिक संवाद तथा सहमति समितिमा पठाउने तयारी गरेको छ ।
