काठमाडौ, २५ जेठ ।
मनसुन सुरु हुनु अझै केही समय लाग्ने भएकाले गर्मी बढ्ने भएको छ । मौसम पूर्वानुमान शाखाले अझै केहीदिन गर्मी कायम रहने बताएको छ ।
मुलुकको पुर्वी भागमा तातो हावा र पश्चिमी भागमा अत्याधिक गर्मीले जनजीवन प्रभावित भएको छ । अबको केही दिनभित्र मनसुनी गतिविधि देखिने जल तथा मौसम पूर्वानुमान महाशाखाले जनाएको छ ।
सामान्यतया जुन १० अर्थात बुधबारदेखि मनसुन सुरु हुनुपर्ने भएपनि अरेवियन सागरमा सक्रिय खालको न्युनचापीय क्षेत्र विकास भएकाले मनसुनीय वायुले गति लिन नसकेको महाशाखाका मौसमविद् मिनकुमार अर्यालले बताउनुभयो ।
यस्तै यसवर्ष धेरैजसो ठाउँमा मनसुनी वर्षा सरदर कम हुने अनुमान गरिएको छ ।
हरेक वर्ष मनसुन सुरु हुनु अघि विश्व मौसम संगठनको अगुवाईमा दक्षिण एसिया क्षेत्रका मौसमविद्को साझा मञ्चले मनसुन सम्बन्धी तयार गर्ने खाकाले यस्तो देखाएको हो ।
नेपालको सुदूर पूर्व र सुदूर पश्चिम बाहेका ठाउँमा सरदर पानी कम पर्ने देखिएको छ ।
वैशाख १२ गतेको भूकम्प र त्यसपछि लागातार आइरहेका पराकम्पनका कारण पहाड र डाँडाकाँडा हल्लिएर कमजोर भएकै बेला पर्ने मुसलधारे पानीले बाढी र पहिरोको जोखिम बढ्न सक्ने भन्दै सतर्कता अपनाउन विज्ञहरुले सुझाव दिएका छन् ।
