काठमाडौ,२५ जेठ ।
भूकम्पका कारण खानेपानीको मुहानहरु सुकेपछि काभ्रेका दुई दर्जन भन्दा बढी गाविसको बासिन्दाहरु मर्कामा परेका छन् । मुहान सुकेर धारामा पानी आउन छाडेपछि स्थानीयहरु प्रदुषित पानी प्रयोग गर्न बाध्य भएको हो ।
जिल्लाको कोशीपारी महांकालचौर, च्यसिङखर्क, डाँडा गाउँ, चलाल गनेशथान, ढुमखर्क, च्याम्राङबेंसी, मिल्चे, फलामेटार, तालढुंगा, कुशादेवी, गाविस तथा पाँचखाल नगरपालिकामा खानेपानीको मुहान सुकेपछि खानेपानीको चरम अभाव देखिएको हो ।
नजिकैको खानेपानीको मुहान सुक्न थालेपछि उक्त क्षेत्रका बासिन्दाले खानेपानीको चरम अभाव भोग्नु परेको स्थानीयले बताएका छन् । उनीहरुका अनुसार पानी अभावकै कारण नुहाउन र कपडा धुनका लागि दुई तीन घण्टाको बाटो हिडेर खोल्सा खोल्सी र खोला धाउनु परेको छ ।
यसअघि नै जिल्लाको च्यासिङखर्क, ढुमखर्क, मेच्चेपौवा, सस्र्युङखर्क, चापाखोरी, बोल्देफेदिचे, पोखरी नारायणस्थान, मेथिनकोट, ठूलोपर्सेल, लगायतका दर्जन गाविसका बासिन्दाले खानेपानी समस्या भोग्दै आएकोमा भूकम्पपछि मुल सुक्न थालेपछि स्थानीय थप समस्यामा परेको हो ।
सयौं वर्ष पुरानो मूल सुकेर गाउँमा खानेपानीको अभाव सिर्जना भएपछि स्थानीय बासिन्दाहरु खानेपानीका लागि वैकल्पिक स्रोतको खोजीमा लागेका छन् ।
