भक्तपुर जेष्ठ २३ ।
नेकपा माओवादीका प्रवक्ता खड्ग बहादुर विश्वकर्माले भूकम्प प्रभावित जनताका लागि आएको राहत रकम र सामाग्रीमा भ्रष्टाचार गर्ने जुनसुकै भ्रष्ट तत्वलाई पार्टीले कार्बाही गर्ने चेतावनी दिनु भएको छ ।
भक्तपुरको नलिनचोकमा भूकम्प प्रभावित जनताको घर पुननिमार्णका लागि खटिएका पार्टीका स्वयसेवक कार्यकर्ताहरुलाई निर्देशन दिदै शनिबार प्रवक्ता प्रकाण्डले उक्त चेतावनी दिनु भएको हो ।
कतिपय सरकारकै मान्छे, सत्ताधारी दलका नेता कार्यकर्ताकै नाम यसमा जोडिनु दुखद: भएको भन्दै उहाले सबै जनताले राहतमा लुट मच्चाउनेलाई छाड्न नहुने बताउनु भयो ।
जनताको गास बास कपासमा समस्या भएका बेला राहत भित्र लुट मच्चाएर केही तत्व मौलाउन खोजेको भन्दै त्यस्तालाई कार्बाही गरिने प्रकाण्डको चेतावनी छ ।
उहाले भूकम्प पछिको उद्धार र पुननिमार्णमा आफ्नो पार्टीले पहिलो पहलकदमी लिएको भन्दै अन्य पार्टीहरु खास गरी सत्ताधारी नेताहरु काममा भन्दा मिडियामा फोटो देखाउनका लागि हिडिरहेको बताउनु भयो ।
यसैबीच प्रकाण्डले अहिले देश विपत्तिमा रहेको बेलामा राष्ट्रिय सरकार र सविधानमा सहमति गर्ने कुरा गरेर नेताहरुले बेमौसमी बाजा बजाएको भन्दै सर्वपक्षीय सहमतिका आधारमा पहिलो काम राष्ट्रको पुननिमार्ण र जनताको पुनर्वास भएको बताउनु भयो ।
यसै गरी उहाले विदेशी शक्तिहरुको सहयोग स्वीकार्य हुने तर सहयोगका नाममा राष्ट्रिय स्वाधीनतामाथि हुने हस्तक्षेप कुनै हालतमा मान्य नहुने बताउनु भयो ।
पार्टीले देशै भरका स्वयसेवकहरुलाई भूकम्प प्रभावित सबै जिल्लामा निरन्तर खटाईरहने भन्दै अहिले जनस्तरबाट पार्टीको कामप्रति राम्रो मुल्याकंन भएको बताउनु भयो ।
भक्तपुरमा विभिन्न स्वयसेवक टोलीले ग्रामिण तथा शहरी क्षेत्रका जनताको लागि टहरा बनाउने काम गर्दै आएको छ ।
सो कार्यक्रममा माओवादी पोलिटव्यूरो सदस्य ईश्वरी दाहाल असारे काका , केन्द्रीय सदस्य मोहन कार्की जीवन्त लगायतका नेता कार्यकर्ताहरु सहभागी थिए ।
