काठमाडौ,१६ जेठ ।
नेपाल इन्भेस्टमेन्ट बैंकद्धारा भूकम्पबाट क्षतिग्रस्त विद्यालयका लागि राहत स्वरुप नुवाकोट पठाएको जस्तापातामा अनियमितता भएको पाइएको छ ।
गत बिहीबार नुवाकोटको कबिलासमा झारिएको नेपाल इन्भेस्टमेन्टको लोगो अंकित झन्डै तीन सय बन्डल रंगीन जस्तापाता पिडितलाई वितरण नगरी बिक्रीका लागि काठमाडौं ल्याउँदै गर्दा स्थानीयले नियन्त्रणमा लिएपछि यस्तो तथ्य सार्वजनिक भएको हो ।
झन्डै ४५ लाख बराबरको जस्तापाता बिक्रीका लागि काठमाडौं ल्याउन खोजिएपछि थानसिंह स्थित छहरेमा राजनीतिक दलहरू र स्थानीयले नियन्त्रणमा लिएका छन् ।
राहतमा आएको जस्तापाता कांग्रेसका केही नेता तथा कार्यकर्ता मिलेर बिक्री गर्न खोजेको आरोप लगाउँदै स्थानीय प्रदर्शनमा उत्रिएका छन् ।
उता नुवाकोटका प्रमुख जिल्ला अधिकारी कोषहरि निरौलाले इन्भेस्टमेन्ट बैंकको लोगो टाँसिएको जस्तापाता आएको पाइए पनि कसरी र केका लागि आएको भन्ने जानकारी अहिलेसम्म आफूले नपाएको बताउनुभएको छ ।
यता बैंकका प्रमुख कार्यकारी अधिकृत पृथ्वीबहादुर पाण्डेले भने नुवाकोटमा स्थानीयको राहतका लागि बैंकले जस्तापाता नपठाएको बताउनुभयो ।
विद्यालयका लागि मात्रै बैंकले पठाएको जस्तापातामाथि कसरी चलखेल हुन पुग्यो भन्ने विषय रहस्यमय बनेको छ । यसबारे सत्यतथ्य छानविन गर्न राजनीतिक दल र स्थानीयहरुले माग गरेका छन् ।
