काठमाण्डौ, १३ जेठ ।
पुर्वाञ्चलमा पाठ्यपुस्तकको अभाव सिर्जना भएको छ । चैत्रमै छपाई भई बितरण भई सक्नुपर्ने पुस्तक अझै नछापिँदा विद्यार्थीलाई समस्या भएको हो ।
जनक शिक्षा सामाग्री केन्द्र पूर्वाञ्चल क्षेत्रीय प्रमुख चन्द्रलाल भोमीले पुस्तक छापिन ढिलाई भएकाले विद्यालयमा समयमै पुर्याउन नसकिएको बताउनुभयो । उहाँले पुस्तक पठाउँदा पठाउँदै पनि केही पठाउन समस्या भएको स्वीकार पनी गर्नुभयो । पुस्तक नआउँदा अविभावक, विद्यार्थी र शिक्षकले पुस्तक व्यवसायी समक्ष गुनासो पोख्ने गरेको स्टेशनरी व्यवसायी महासंघका मोरङ अध्यक्ष माधव अधिकारीको भनाई छ ।
यसैविच पुस्तक अभाव भएपछि स्टेशनरी व्यवसायी संघले जनक शिक्षा सामाग्री केन्द्रको पूर्वाञ्चल कार्यालयमा तालाबन्दी समेत गरेको खबर छ । समयमै पाठ्पुस्तक बजारमा नआउँदा व्यवसायी आक्रोशित भएका हुन् ।
जनक शिक्षाका पूर्वाञ्चल क्षेत्रीय प्रमुख भोमीका अनुसार दोस्रो पटक पाँच हजार पुस्तक आएको थियो, अझै ३५ हजार पुस्तकको सेट आइपुग्न बाँकी छ । मेची–कोसी अञ्चलमा कक्षा ८ को मात्रै ८५ हजार सेट पुस्तक आवश्यक छ ।
जसमा पहिलो खेपमा ४५ हजार मात्रै आइपुगेको छ । कक्षा ८, ९ र १० को पाठ्यपुस्तक बिक्री–वितरण गर्दै आएको केन्द्रसँग शैक्षिक सत्र सुरू भएको दुई महिना बित्न लाग्दा पनि पुस्तक छैन ।
पुस्तक उपलब्ध नहुँदा मेची–कोसीको १० वटा जिल्लाका सरकारी विद्यालयमा कक्षा ८, ९ र १० को पाठ्यपुस्तक बिक्री–वितरण गर्न जनक शिक्षाले पुस्तक छपाईमा ढिलाई भएको जनाएको छ ।
सरकारले शैक्षिकसत्रको प्रारम्भमै पुस्तक पुर्याउन १ देखि ५ कक्षासम्मको पाठ्यक्रम छाप्ने अधिकार निजी क्षेत्रमा दिएको छ । कक्षा ६ र ७ को पुस्तक गएको वर्षको स्टक बिक्री गर्ने अधिकार समेत मुद्रण व्यवसायीलाई दिइएको छ । कक्षा ८, ९ र १० को पाठ्यपुस्तक जनक शिक्षाले छाप्ने अधिकार पाएको छ ।
