काठमाडौं, ३ जेठ ।
राहत वितरणको कार्य निरन्तर भैरहँदा पनि पिडितले राहत नपाएको गुनासो बढ्न थालेपछि सरकारले राहत नपुगेको ठाउँमा प्रमुख जिल्ला अधिकारीलाई सम्पर्क गर्न आग्रह गरेको छ । गृहमन्त्रालयका प्रवक्ता लक्ष्मी प्रसाद ढकालले सरकारका तर्फबाट समान राहत वितरणका लागि निरन्तर जुटिरहेकाले राहत नपाएका पिडितहरुले प्रमुख जिल्ला अधिकारीलाई सम्पर्क गर्न आग्रह गर्नुभयो ।
उहाले आज पनि भूकम्प प्रभावित ठाउँमा दाल, चामल, तेल, नुन आदि पकाएर खान मिल्ने खानेकुरा लगिरहेको बताउनुभयो । विशेषगरी बैशाख २९ गतेको भूकमपका कारण बढी प्रभावित दोलखा, रामेछाप, सोलुखुम्बु, सिन्धुपाल्चोक लगायतका ठाउँमा राहत वितरणको काम भैरहेको छ ।
यस्तै भूकम्पबाट ज्यान गुमाएकाको शव पहिचान गरी सम्बन्धित परिवारलाई बुझाउने काम भैरहेको सरकारले जनाएको छ । पहिचान हुन बाँकी शव भने विभिन्न अस्पतालमा राखिएका छन् ।
