काठमाडौं, २ जेठ ।
प्रधानमन्त्री सुशील कोइराला र अन्तराष्ट्रिय रेडक्रस महासंघका महासचिव इल्हाज एस्सीबीच आज बिहान भेटवार्ता भएको छ । प्रधानमन्त्री निवास बालुवाटारमा भएको भेटमा विनाशकारी भूकम्पले गरेको क्षति, उद्धार, राहत, पुनस्थापना, पुनर्निर्मार्ण र मानवीय सहयोगका बिषयमा छलफल भएको थियो ।
भेटमा प्रधानमन्त्री कोइरालाले नेपालमा आएको विपत्तिका समयमा अन्तराष्ट्रिय रेडक्रसले गरेको मानवीय सहयोगको प्रसंसा गर्दै पुनस्थापना र पुनर्निर्माणको चरणमा थप सहयोग आवश्यक पर्ने बताउनु भयो ।
उहाले प्राकृतिक विपत्तिको सामना गर्ने आवश्यक ज्ञान, संस्थागत संरचना, जनशक्ति र स्रोत साधनको कमीले क्षति बढी हुन गएको धरण राख्नु भयो ।
वार्ताका क्रममा आइएफआरसीका महासचिव एस्सीले नेपाल रेडक्रससंगको साझेदारी र सहयोगमा कार्य गरिरहेको बताउदै विपद्को घडीमा आइएफआरसीले सहयोग रकम तेब्बर पार्ने घोषणा समेत गर्नु भयो ।
उहाले भूकम्पबाट भएको क्षतिको पुननिर्माण कार्यसँगै प्राकृतिक विपद्बाट जोगाउन संस्थागत संरचना, कानुनी संरचना र आवश्यक जनशक्ति जुटाएर विपद् सामना गर्ने स्रोत साधन तयारी राख्नु पर्नेमा जोड दिनु भयो ।
भूकम्प पीडितहरुलाई तत्काल राहत स्वरुप आइएफआरसीले ३३ मिलियन अमेरिकी डलर सहयोग गरिसकेको छ ।
