काठमाडौँ, वैशाख ३१ ।
पछिल्लो भूकम्पका कारण कक्षा ११ र १२ को वार्षिक परीक्षा अनिश्चित भएको छ । वैशाख १२ को विनासकारी भूकम्पका कारण स्थगन भएको परीक्षा मंगलबारको ६ दशमलव ८ रिक्टर स्केलका भूकम्पका कारण थप अनिश्चित भएको हो ।
यही वैशाख २० गते कक्षा १२ को परीक्षा हुने कार्यतालिका रहेकामा भूकम्पका कारण स्थगित भएको थियो भने आगामी जेठ १ गतेका लागि तय भएको कक्षा ११ को परीक्षा पनि स्थगन भएको थियो ।
उच्चमाध्यमिक शिक्षा परिषद्का परीक्षा उप–नियन्त्रक जयन्ती सत्यालले मंगलबारको भूकम्पबाट विद्यालयमा भएको क्षतिको बारेमा पुनः अध्ययन गरेर मात्रै नयाँ मिति तोक्ने विषयमा परीक्षा समितिले निर्णय गर्ने बताउनुभयो ।
आगामी जेठको मसान्तसम्म परीक्षाको नयाँ तालिका निर्धारण गर्ने बारेमा निर्णय हुन सक्ने उहाको भनाइ छ । भूकम्पबाट अति प्रभावित १४ जिल्लाका अधिकांश विद्यालय भवनमा क्षति पुगेकाले शिक्षा मन्त्रालयले जेठ १५ सम्म पठन पाठन बन्द गराएको छ ।
