काठमाडौं, २८ वैशाख ।
वैशाख १२ गतेको बिनाशकारी भूकम्पले निम्त्याएको संकटबाट उम्कन व्यवस्थापिका संसद्को बैठकमा प्रस्तुत भएको संकल्प प्रस्तावमाथिको छलफल दोश्रो दिन सोमबार पनि जारी छ ।
संकल्प प्रस्तावमाथिको छलफलमा सभासद्हरुले वर्षाको मौसम नजिकिएको भन्दै भूकम्पमा पीडितको अस्थायी बसोबासको उचित बन्दोबस्त गर्न सरकारको ठोस कार्यक्रम आउनुपर्ने धारणा राखेका छन् ।
छलफलमा सभासदहरुले हाल सरकारले उपलब्ध गराएको राहत नाम मात्रको भएकोले भरपर्दो र अनुभूति हुने खालको राहत प्याकेज ल्याउन माग गरेका छन् । भूकम्प प्रभावित जिल्लाका कतिपय गाबिसमा अहिलेसम्म राहत पाउन नसकेको भन्दै सबै प्रभावितहरुलाई समानरुपमा राहत उपलब्ध गराउन सरकारको ध्यानाकर्षण गरेका छन् ।
व्यवस्थापिका संसद्को शनिबारको बैठकमा भूकम्प प्रभावितलाई सरकारले घर निर्माण गरिदिनेलगायतका २७ बुँदे संकल्प प्रस्ताव पेश भएको थियो ।
भूकम्प प्रभावितहरुको राहत र पुर्नस्थापनाका लागि नेपाली कांग्रेस, नेकपा एमाले र एकीकृत नेकपा माओवादीले संयुक्त रुपमा पेश गरेको संकल्प प्रस्तावको राप्रपा नेपाल, मधेशी जनअधिकार फोरम लोकतान्त्रिक लगायतका २४ दलले समर्थन गरेका छन् ।
