काठमाडौ, २८ बैशाख ।
व्यवस्थापिका संसदको बैठक आज पनि बस्दैछ । आजको बैठकमा भूकम्प प्रभावितको राहत र पुनस्र्थापनाका लागि व्यवस्थापिका संसदमा पेस भएको साझा संकल्प प्रस्तावमाथि सभासद्हरुले धारण राख्ने क्रम जारी रहने छ ।
भुकम्प प्रभावित जिल्लाका सदस्यहरुलाई संकल्प प्रस्तावमा धारणा राख्न पहिलो प्राथमिकता दिइए पनि अरु सभासद्हरुले समेत आफ्नो भनाइ राख्न चाहेकाले आज पनि सभासद्हरुको बोल्ने क्रम जारी रहने संसद सचिवालयले जनाएको छ ।
यसअघि दुई दिन छलफल गरेर संकल्प प्रस्ताव पारित गर्ने भनिए पनि प्रस्ताव माथि बोल्ने सभासद्हरु बढी भएकाले आज पारित हुने संभावना न्युन रहेको संसद सचिवालयका सह प्रवक्ता सुदर्शन कुईकेलले जानकारी दिनुभयो ।
संसदमा पेश भएको प्रस्तावमा आवासविहीन भएकालाई नयाँ घर नबनेसम्म अस्थायी घर, डेरामा बस्ने र उद्योग व्यवसायी गर्नेहरुलाई राहत दिने उल्लेख छ । यस्तै नयाँ आवास नीति र एकीकृत वस्ती विस्तार योजना सरकारले बनाउनु पर्ने पनि संकल्प प्रस्तावमा उल्लेख गरिएको छ ।
