काठमाडौं ११बैशाख।
जलविद्युत सम्झौतामा राष्ट्रघाट भएको दाबी गर्दै सम्झौता गर्नेहरुप्रति आक्रामक रुपमा प्रस्तुत भएको विप्लव माओवादीलाई फकाउन ऊर्जा क्षेत्रका अधिकारीहरु लागिपरेका छन् ।
पछिल्लो समय लगानी बोर्डका कार्यकारी निर्देशक राधेश पन्तदेखि ऊर्जासचिवसम्मको घरमा माओवादी कालोझण्डा गाड्न पुगेपछि आतंकित भएका अधिकारीहरु विप्लव माओवादीलाई सम्झौताबारे आस्वस्त पार्न लागि परेका हुन् ।
स्रोतका अनुसार स्वयम् ऊर्जामन्त्री राधा ज्ञवाली विप्लवलाई भेटेर सझौताबारे आस्वस्त पार्न लागिपरेकी छन् । तर, विप्लवले उनलाई भेट्न नचाहेपछि उनी तनावमा रहेकी छन् ।
पटकपटक विप्लवलाई भेट्ने प्रयास विफल भएपछि तनावमा रहेकी ज्ञवालीले विप्लवलाई पटकपटक फोन समेत गर्ने गरेको एक नेताले बताए । तर, विप्लव भने उनकै शब्दमा ‘ राष्ट्रघाती सम्झौता’ नसच्याएसम्म नभेट्ने अडानमा छन् ।
चन्द माओवादीले भारतीय कम्पनी जिएमआर र लगानी बोर्डबीच माथिल्लो कर्णाली जलविद्युत आयोजना निर्माणका लागि भएको आयोजना विकास सम्झौता र नेपाल र भारत सरकारबीच भएको विद्युत व्यापार सम्झौता पिटीएको विरोध गर्दै आएको छ । ती दुई सम्झौतालाई राष्ट्रघातीको संज्ञा दिँदै उसले आन्दोलन घोषणा गरेको छ ।
