म्याग्दी, ४ बैशाख ।
सरकारको देशव्यापी कार्यक्रम अनुसार म्याग्दीमा पनि विद्यार्थी भर्ना अभियान चलिरहेको छ ।
जिल्लामा यसपटक विद्यालयको पहुँचभन्दा बाहिर रहेका करिब ६ प्रतिशत बालबालिकालाई पनि यो पटक भर्ना गराउने लक्ष्य राखिएको जिल्ला शिक्षा कार्यालय म्याग्दीले जनाएको छ ।
जिल्लामा हाल करिब ९४ दशमलव ३ प्रतिशत बालबालिका मात्रै विद्यालयमा भर्ना रहेकामा भर्ना अभियानबाट विद्यालय जानबाट वञ्चित रहेका ५ दशमलव ७ प्रतिशत बालबालिकालाई समेट्ने लक्ष्य राखिएको जिल्ला शिक्षा कार्यालयका निमित्त जिल्ला शिक्षा अधिकारी टेक प्रसाद पाण्डेले जानकारी दिएका छन् ।
वैशाख ३ गतेदेखि १५ गतेसम्म भर्ना हुन विद्यालय आउने विद्यार्थीलाई विद्यालयमा नियमित भर्ना गराउने र त्यसपछि वैशाख ३० सम्म घरदैलो अभियानमार्फत तथ्याङ्क सङ्कलन गरी विद्यार्थी भर्ना गराउने सरकारको कार्यक्रम छ ।
