बागलुङ,२८ चैत ।
बागलुङ निर्वाचन क्षेत्र नम्बर १ मा आज जारी संविधासभाको उप निर्वाचनमा मतदाताको उत्साहजनक सहभागिताका साथ सम्पन्न भएको छ ।
बागलुङमा पहिलो पटक विद्युतिय मतदान मेसिनबाट विहान ७ बजे देखि शुरु भएको मतदान प्रक्रिया बेलुका ५ बजेसम्म चलेको थियो । यसपटक बागलुङको उपनिर्वाचनमा ३८ हजार मतदाताले मतदान गरेको जिल्ला निर्वाचन कार्यालयका प्रमुख टोलराज उपाध्यायले बताए ।
संविधान सभाको दोश्रो निर्वाचनमा ७६ प्रतिशत मतदान भएकोमा यसपटक भने ७३ प्रतिशत मात्र मतदान भएको उपाध्यायले बताए ।
गत निर्वाचनमा ४७ हजार मतदाता रहेको र यसपटक ५२ हजार मतदाता हुँदा समेत मतदान कम हुनुमा मतदाता सूचीमा नाम भएका युवाहरु बैदेशिक रोजगारको लागि विदेश जानु र जिल्लाबाट अन्यत्र गएका व्यक्तिहरु नआएको कारण ३ प्रतिशत मत घटेको हुनसक्ने उपाध्यायले बताए ।
बागलुङ नगरपालिका सहित १९ वटा गाउँ विकास समितिका ७० वटा मतदान केन्द्रमा मतदाताहरुले शान्तिपूर्ण रुपमा मतदान गरेका थिए ।
बागलुङ नगरपालिकामा १२ हजार मतदाता मध्ये ९ हजार र १९ वटा गा.वि.स. मध्ये सबैभन्दा बढी बिहुँ गा.वि.स.मा २ हजार ७ सय ६ र सबैभन्दा कम अर्गल गा.वि.स.मा ९ सय ४२ मत खसेको थियो ।
५२ हजार मतदाता रहेको बागलुङ क्षेत्र नं. १ को लागि यस उपनिर्वाचनमा नेपाली काँग्रेसबाट स्व. हरि बहादुर खड्काकी श्रीमती चम्पादेवी खड्का, नेकपा एमालेबाट मन कुमारी के.सी., एमाओवादीबाट कृष्ण बहादुर के.सी, राष्ट्रिय जनमोर्चाबाट नेत्र बहादुर बुढाथोकी लगायत १० राजनैतिकदल र ३ जना स्वतन्त्र उम्मेदवार गरी १३ जना चुनावी मैदानमा उत्रिएका थिए ।
