गौर चैत्र २५ । झण्डै दुई सातादेखि दुई सरकारी कार्यलय चन्द्रनिगाहपुरमा सार्ने निर्णय विरुद्ध गौरमा भईरहेको आन्दोलन फिर्ता भएको छ । गएराति अवेर सम्म जिल्ला प्रशासन कार्यलय र आन्दोलनकारीबीच भएको वार्तामा शसस्त्र प्रहरीको गाडीको ठक्करबाट मृत्यु भएका ६१ वर्षे राम आशिस ठाकुरका परिवारलाई उचित क्षतिपुर्ति दिलाउने , शहीद घोषणाका लागि प्रकृया अघि बढाउने, रौतहट घटनाको सत्यतथ्य छानविन गरी दोषीमाथि कार्बाही गर्ने लगायतका विषयमा सहमति भए पछि आन्दोलन फिर्ता भएको हो । हाल सम्म भएको झडपमा परी तीन दर्जन बढी मानिसहरु घाईते भएका थिए । रौतहट जिल्ला प्रशासन प्रमुख मदन भुजेलले गएरातिको सहमति पछि आन्दोलन फिर्ता भएर परिस्थिति सामान्य भएको बताउनु भयो । नापी र मालपोत कार्यलय सहित केही सेवा केन्द्र गौरबाट चन्द्र निगाहपुरमा सार्ने सरकारको निर्णयको विरुद्धमा त्याहा आन्दोलन भएको थियो ।
