काठमाडौँ । आगामी जनवरी २१ देखि फेब्रुअरी ६ सम्म आयोजना हुने आइसीसी यू–१९ महिला टी–२० विश्वकप क्रिकेटको खेल तालिका सार्वजनिक भएको छ। अन्तर्राष्ट्रिय क्रिकेट परिषद् (आइसीसी) ले सार्वजनिक गरेको खेल तालिका अनुसार यसपटकको विश्वकप नेपाल र बंगलादेशले संयुक्त रूपमा आयोजना गर्दैछन्।
प्रतियोगितामा सहभागी १६ टोलीलाई चार वटा समूहमा विभाजन गरिएको छ। नेपाल समूह ‘ए’ मा रहेको छ, जहाँ भारत, आयरल्यान्ड र वेष्ट इन्डिज जस्ता बलिया टोलीहरू समावेश छन्। त्यसैगरी समूह ‘बी’ मा दक्षिण अफ्रिका, न्यूजिल्यान्ड र समोआ रहेका छन् भने समूह ‘सी’ मा अस्ट्रेलिया, बंगलादेश, नाइजेरिया र युएई परेका छन्। समूह ‘डी’ मा भने इंग्ल्यान्ड, श्रीलंका, अमेरिका र स्कटल्याण्ड बीच प्रतिस्पर्धा हुनेछ।
संयुक्त आयोजकका रूपमा रहेको नेपालमा प्रतियोगिताका कुल १५ खेलहरू सञ्चालन हुनेछन्। नेपालका खेलहरू काठमाडौँस्थित त्रिवि क्रिकेट मैदान र माथिल्लो मुलपानी क्रिकेट मैदानमा सञ्चालन गरिने तालिका छ। नेपालले समूह चरणका आफ्ना सबै खेलहरू घरेलु मैदान त्रिवि क्रिकेट मैदान कीर्तिपुरमा खेल्नेछ।
नेपालले आफ्नो पहिलो खेल जनवरी २२ मा आयरल्यान्डविरुद्ध खेल्दै विश्वकप यात्राको सुरुवात गर्नेछ। त्यसपछि दोस्रो खेल जनवरी २४ मा भारतसँग र तेस्रो खेल जनवरी २६ मा वेष्ट इन्डिजसँग खेल्ने तय भएको छ। प्रतियोगिताका बाँकी २६ खेलहरू भने बंगलादेशका विभिन्न मैदानहरूमा आयोजना हुनेछन्।
समूह चरणका खेलपछि शीर्ष तीन-तीन टोली सुपर सिक्स चरणमा प्रवेश गर्नेछन्। सुपर सिक्सका टोलीहरूलाई दुई समूहमा विभाजन गरी प्रतिस्पर्धा गराइनेछ र दुवै समूहका शीर्ष दुई-दुई टोली सेमिफाइनलमा पुग्नेछन्। प्रतियोगिताका दुवै सेमिफाइनल खेल फेब्रुअरी ४ मा बंगलादेशको वीर श्रेष्ठ सहिद फ्लाइट लेफ्टिनेन्ट मतिउर रहमान क्रिकेट रंगशालामा हुनेछन् भने उपाधि भिडन्त (फाइनल खेल) फेब्रुअरी ६ मा बंगलादेशमै आयोजना हुनेछ।
