अमेरिकी अन्तरिक्ष संस्था नासाको स्पेसएक्स क्रु–१२ मिसन अन्तर्राष्ट्रिय अन्तरिक्ष केन्द्रबाट बुधबार सफलतापूर्वक छुट्टिएर पृथ्वीतर्फ फर्किने यात्रा सुरु गरेको छ। चार अन्तरिक्ष यात्री बोकेको ड्रागन अन्तरिक्षयान अमेरिकी पूर्वी समयअनुसार बुधबार बिहान ८ बजेर ५ मिनेटमा अन्तर्राष्ट्रिय अन्तरिक्ष केन्द्रबाट अलग भएको नासाले जनाएको छ। अन्तरिक्षयानले अन्तरिक्ष केन्द्रबाट छुट्टिएपछि पृथ्वीमा फर्किने निर्धारित मार्ग समातेको छ। नासाका अनुसार ड्रागन अन्तरिक्षयान बिहीबार बिहान करिब ११ बजेर ३४ मिनेटमा क्यालिफोर्नियाको तट नजिकै प्रशान्त महासागरमा अवतरण गर्नेछ। समुद्रमा सुरक्षित अवतरण भएपछि उद्धार टोलीले अन्तरिक्ष यात्रीहरूलाई अन्तरिक्षयानबाट बाहिर निकाल्नेछ। यससँगै क्रु–१२ मिसनको महिनौँ लामो अन्तरिक्ष यात्रा औपचारिक रूपमा समाप्त हुनेछ। क्रु–१२ मिसनमा नासाका अन्तरिक्ष यात्री जेसिका मियर र ज्याक ह्याथवे, युरोपेली अन्तरिक्ष एजेन्सीकी अन्तरिक्ष यात्री सोफी एदेनो तथा रुसी अन्तरिक्ष यात्री आन्द्रे फेद्यायेभ सहभागी छन्। उहाँहरुले अन्तर्राष्ट्रिय अन्तरिक्ष केन्द्रमा रहँदा विभिन्न वैज्ञानिक तथा अन्तरिक्षसम्बन्धी गतिविधिमा सहभागिता जनाएका थिए। क्रु–१२ मिसन गत फेब्रुअरी १३ मा फ्लोरिडास्थित केप क्यानाभेरल अन्तरिक्ष प्रक्षेपण केन्द्रबाट प्रक्षेपण गरिएको थियो।
अन्तर्राष्ट्रिय अन्तरिक्ष केन्द्र पृथ्वीको कक्षमा रहेको बहुराष्ट्रिय वैज्ञानिक प्रयोगशाला हो, जहाँ विभिन्न देशका अन्तरिक्ष यात्रीले सूक्ष्म गुरुत्वाकर्षणको अवस्थामा विज्ञान, प्रविधि र मानव अन्तरिक्ष यात्रासँग सम्बन्धित अनुसन्धान गर्दै आएका छन्। क्रु–१२ का चार सदस्य पृथ्वीमा फर्किएपछि उहाँहरुको लामो अन्तरिक्ष अभियान पूरा हुनेछ।
