काठमाडौँ। काठमाडौँको त्रिपुरेश्वरस्थित राहदानी विभाग अघिल्तिर बस पकेटमा सोमबार मध्याह्न १२:१५ बजे चालकले आफ्नै बसभित्र आगो लगाउँदा बस पूर्ण रूपमा जलेर नष्ट भएको छ भने चालक स्वयं गम्भीर घाइते भएका छन्। काभ्रेको पनौती-६ घर भएका २५ वर्षीय चालक दावा लामाले बा.५ ख ४२७४ नम्बरको रिद्धिसिद्ध यातायातको मिनिबसभित्रै आगो लगाएका हुन्।
अनावश्यकरूपमा हर्न बजाएको आरोपमा ट्राफिक प्रहरीले कागजात मागेर कारबाही गर्न खोजेपछि विवाद उत्पन्न भएको थियो। आफूले गल्ती नगरेको जिकिर गर्दै लामाले सडक अवरुद्ध गरेपछि थप सुरक्षाकर्मीले सम्झाउने प्रयास गरेका थिए। तर, विवादकै बिच लामाले आगो लगाएका थिए। ९५ प्रतिशत शरीर जलेका उनको कीर्तिपुर बर्न अस्पतालमा उपचार भइरहेको छ। घटनाको अनुसन्धान गर्न एसएसपी रमेश बस्नेतको संयोजकत्वमा ५ सदस्यीय छानबिन समिति गठन गरिएको छ।
ठिक साढे दुई महिनाअघि (असार २५ गते) सोही स्थानमा नगर प्रहरीसँगको विवादपछि सेयर राइडर गणेश नेपालीले पनि आत्मदाह गरेका थिए। उच्च अदालतका पूर्वन्यायाधीश केशवप्रसाद बास्तोला नेतृत्वको समितिले दिएको सुधारका सिफारिसहरू (सडक सुरक्षा, तनाव व्यवस्थापन काउन्सेलिङ र सिंगल ह्याण्डेलिङ प्रणाली) कार्यान्वयन नहुँदा र साना सडक विवादमा सुरक्षा निकायले संवेदनशीलता नदेखाउँदा उस्तै प्रकृतिको दुखद घटना दोहोरिएको भन्दै आलोचना भइरहेको छ।
